Algemein kan gestèld wère det de Road van èllef de spil en de kern is van ein carnavalsvereniging. Hè vormt neet allein het besteur, mer geit auch veur in alle activiteiten van de vereniging. Kèsing is echter ein oetzunjering. Aangezeen de taken zoe oetgebreid zeen, höbbe wè versterking van de lèste vief prinse (eventueel nog angere oaj prinse die de vereniging neet kônne misse) en ein afvaardiging van de jeugdroad. Samen vormen wè de carnavalsvereniging.

De Kèsingse Road van Èllef zörgt eder joar veur de opening van de prinsenzitting. Meistal betreft het ein hiël origineel idee, det zelf oetgedach en oetgewirkt weurt. De weurd kopiëren of plagiëren stoan neet in oos woordenbook.

De road bestuit oet 11 mannelijke componenten van de maatsjappiej. Weurt deze magische 11 neet gehoold den is de road neet compliet. In de geschiedenis van de Kèsingse road hèt er oeit een vrouwelijke aafgevaardigde gezèteld. Mer gè wèt wiej det geit met vrouwen, het hèt zien gooie doch auch zien minder gooie kanten (hiejmèt weurt neet de vrouw op zich bedoeld, mer gewuun het gedacht, ein vrouw mèt tien mansluuj) 

Op offisjele activiteiten weurt door deze road ein zwarte smoking (mèt greun renj) gedragen. Het verstand weurt biejein gehoaje door eine greunwittesteek, de kleuren van de vereniging. De foto's hiej sprèke beukdeil. Gè merktj direct det het neet de bedoeling is om mèt deze bende oet te pakken op ein of angere mister verkeezing.